Syèl nan Nouyòk pa gen zetwal

Pou moun al pwomennen nan douvan jou

Lalin pòtre tèt gridap

k ap touse nan lafimen

Je tout moun vire lanvè

Tout Nouyòk siti

ap gade tivi

Plis imaj lan klè

Plis tèt mwen retresi

Cho bizniz se gwo biznis

Faktori nan Nouyòk

mem jès la repete

senk mil sèt san swasant fwa

sis jou sou sèt plis ovètaym

Ponnche a dwat ponnche a goch

depi solèl leve jouk solèy leve

Fwèt kach la tounen likou

bitasyon an li menm pa chanje

(E lè you fin pase n nan gildiv

lè yo fin souse san n

lè yo repase n tankou po kann

lè vye kò rapadou n

fin bouyi nan manmit Wall Street--

gade bèl sik blan fen sa a se nou!

lè yo fin evesti dènye kras kouray nou

you krache po vid la

pou l al fè lwanj demokrasi)

Lari Nouyòk chaje tonton makout

Gran nèg bezwen pwoteksyon

Men ou kwè san mil koko makak

ap rive kouvri tout pwen fèb yo

lè jou malè rive?

Daniel Simidor.